Жатақханада психологиялық кинотеатр өтті

2025 жылдың 10-13 ақпан аралығында «Педагогика және психология» факультетінің «Психология: практикалық психологты даярлау» мамандығының 4 курс студент-практиканттары мен Психологиялық қолдау қызметінің психологтары «Құмар ойынның құрығына түспейік!» тақырыбында жатақхана студенттерімен «ПсихоКадр» психологиялық кинотеатрын ұйымдастырып, өткізді.

Психологиялық кинотеатрдың мақсаты - студенттер арасында лудоманияның алдын алу, студенттердің патологиялық құмар ойындарға тәуелділік мәселелері, оның себептері мен салдары туралы хабардарлығын арттыру, сыни ойлауды және құмар ойындарға жауапкершілікпен қарауды дамыту.

Іс-шара барысында мазмұнды бейнероликтер көрсетілді. Бірінші бейнероликте лудоманияның құмар ойындарға патологиялық тәуелділік ретінде мәнін көрсетті. Онда лудоманиямен бетпе-бет келген адамдардың жеке тәжірибелері, құмар ойындардың олардың өмірін қалай жаулап алғаны және тәуелділіктен аулақ болу үшін қандай қадамдар жасағаны туралы баяндалады. Екіншісі - ойынға тәуелділіктің жеке адамға, мансапқа, отбасына және қоғамға әсерін көрсететін профилактикалық бейне. Видеода тәуелділіктің қалыптасуына әсер ететін ойын бизнесінің стратегиялары, сондай-ақ оларға қарсы тұру жолдары қарастырылды. Бейнероликтерді талқылау өзара сенім мен ашықтық жағдайында өтті.

Іс-шара соңында студенттер бейнероликтерді көруден алған сезімдерімен бөлісті, құмар ойындардың негізгі тәуекелдерін және тәуелділікті жеңудің болжамды тиімді жолдарын талқылап, сұрақтар қойып, тақырып бойынша қорытынды жасады. Психологиялық кинотеатрға біздің университеттің № 1, 2, 3 және 8 жатақханаларының 80-нен астам студенті қатысты.