Соқпақбаев шығармашылығына арналған көрменің жабылу салтанаты

2024 жылдың 26 қарашасында Абай атындағы Қазақ Ұлттық педагогикалық университетінде қазақстандық балалар жазушысы, балалар туралы көптеген шығармалардың авторы, ақын Бердібек Соқпақбаевтың шығармашылығына арналған көрменің жабылу салтанаты өтті. Шараға Абай университетінің оқытушылары мен студенттері, қала қонақтары қатысты. Жиын барысында көрменің маңыздылығы мен ел мәдениетіне қосқан үлесі туралы айтылды.

Салтанатты шарада Бердібек Соқпақбаевтың қызы Самал Соқпақбаева өз әкесі туралы сыр шертіп, оның қазақ әдебиетіндегі орны мен шығармаларының ұрпақ тәрбиелеудегі маңыздылығын айтып, көрмені ұйымдастырушылар мен қатысушыларға алғысын білдірді.

Жиын барысында сөз алған Абай университетінің ректоры Болат Тілеп Бердібек Соқпақбаевтың шығармашылығын зерттеу мен насихаттаудың маңыздылығына тоқталды. Сонымен қатар көрнекті тұлғаның шығармалары - қазақ халқының мәдениетін насихаттайтын баға жетпес мұра екенін де атап өтті. «Бердібек Соқпақбаевтың кейіпкерлері әділдік, адамгершілік және патриотизм құндылықтарын бойына сіңірген тұлғалар. Әсіресе, балалар әдебиеті саласындағы шығармалары жас ұрпақты тәрбиелеуде ерекше орын алады»,-деді ректор.

Іс-шара барысында Өнер факультетінің деканы Кәрім Байқұтов жүлделі орын алған студенттерді марапаттап, олардың шығармашылық жетістіктері мен еңбектерін жоғары бағалады.