қазақша · русский · english
 
 
 

Практикалық ағылшын тілі кафедрасының халықаралық ынтымақтастығы
Бүгінде халықаралық ынтымақтастық жоғары білім берудің стратегиялық дамуының ажырамас бөлігіне айналды. Шетелдік университеттермен бірлескен жұмыс оқыту үдерісіне озық тәсілдерді енгізуге, тәжірибе алмасуға, академиялық көкжиектерді кеңейтуге және жаһандық еңбек нарығында бәсекеге қабілетті мамандар даярлауға мүмкіндік береді.


Филология институтының практикалық ағылшын тілі кафедрасы халықаралық серіктестікті белсенді дамытып келеді. Кафедра академиялық ұтқырлықты арттыруға, әлемдік білім беру кеңістігіне кірігуге және оқытушылар мен студенттердің ғылыми әлеуетін нығайтуға басымдық береді.


Кафедраның халықаралық қызметінің негізгі бағыттары:
Студенттерді даярлау сапасын арттыру. Халықаралық стандарттарды ескере отырып білім беру үдерісін икемді әрі заманауи етуге, сыни ойлау мен мәдениетаралық коммуникация дағдыларын дамытуға мүмкіндік береді.

 

Жұмыспен қамтылу мүмкіндіктерін кеңейту. Шетелдік тағылымдамаларға, алмасу бағдарламаларына және білім беру жобаларына қатысу түлектердің Қазақстанда да, шет елдерде де жұмысқа орналасу мүмкіндігін айтарлықтай арттырады.

 

Тілдік және мәдениетаралық құзыреттіліктерді дамыту. Ағылшын тілін халықаралық өзара әрекеттесу жағдайында оқыту - коммуникативтік даярлығы жоғары, еңбек нарығында сұранысқа ие мамандарды даярлауға ықпал етеді.

 

Ғылыми ынтымақтастық пен тәжірибе алмасу. Бірлескен зерттеулер жүргізу, конференцияларға қатысу және халықаралық басылымдарда мақала жариялау оқытушылардың кәсіби өсуіне жағдай жасайды.


Кафедра ұлттық бастамаларға ерекше мән береді:
«Болашақ» мемлекеттік стипендиялық бағдарламасы. Кафедра оқытушылары мен түлектері әлемнің жетекші жоғары оқу орындарында білім алып, тағылымдамадан өту үшін осы бағдарламаның байқауына қатысып келеді.

 

«500 ғалым - шетелде тағылымдамадан өту» жобасы. Қазақстан Республикасы Ғылым және жоғары білім министрлігінің бұл бастамасы кафедра оқытушыларына шетелдік ғылыми орталықтарда тағылымдамадан өту мүмкіндігін ұсына отырып, білім беру мазмұнын жаңартуға және кафедраның академиялық әлеуетін арттыруға ықпал етеді.

 

2023-2024 оқу жылында шетелде тағылымдамадан өткен кафедра оқытушыларының саны - 2 адам.


Кафедра оқытушылары М.Б. Төлегенова мен А.С. Набидуллин «Болашақ» халықаралық бағдарламасы аясында 2023 жылғы 20 тамыз бен 2024 жылғы 21 тамыз аралығында АҚШ-тың Мичиган мемлекеттік университетінде тағылымдамадан өтті.


2025 жылдың наурыз айында «Болашақ» халықаралық бағдарламасы: жаңа мүмкіндіктер» атты семинар-тренинг өткізу жоспарланып отыр. Семинар аясында екі секция жұмыс істейді:
ғылыми зерттеу: «Writing your journal article in twelve weeks»,

педагогикалық жаңашылдық: «Reading Circle».


Халықаралық конференцияларға қатысу
М.Б. Төлегенова мен А.С. Набидуллин 2024 жылғы 21-23 наурыз аралығында АҚШ-тың Флорида штатындағы Тампа қаласында өткен TESOL International Convention & Expo жыл сайынғы халықаралық конференциясына қатысты.


Халықаралық ынтымақтастықтың мақсаттары мен міндеттері:
студенттердің, магистранттар мен докторанттардың академиялық ұтқырлығын ұйымдастыру;

шетелдік профессорлардың қатысуымен қонақ дәрістер өткізу;

қос дипломды білім беру бағдарламаларын жүзеге асыру;

оқытушылар мен жас зерттеушілердің ғылыми тағылымдамаларын ұйымдастыру;

халықаралық ғылыми-зерттеу жобаларына қатысу;

халықаралық конференциялар, семинарлар мен мәдени іс-шараларды өткізу.

 

Практикалық ағылшын тілі кафедрасы білім беру мен ғылымдағы жоғары стандарттарға ұмтылып, халықаралық байланыстарды одан әрі кеңейтуге ниетті.