«Құзыретті тәлімгер мен жаңашыл жас маман» тақырыбында шебер сынып

Бүгінгі білім саласының жаңғыру дәуірінде болашақ мұғалімнің кәсіби қалыптасуы – ел ертеңінің көрінісі. Осы мақсатта №169 мектеп-лицейі «Құзыретті тәлімгер мен жаңашыл жас маман» тақырыбында Абай атындағы Қазақ ұлттық педагогикалық университетінің 2-курс студенттеріне шебер сынып өткізді. Шара білім беру процесіндегі жаңа үрдістерді танытып қана қоймай, студенттің кәсіби ой әлемін кеңейтуге бағытталды. Шеберлік сабақ барысында білім беру мекемелерінде аса маңызды саналатын бірнеше өзекті бағыттар қамтылды. Алдымен «Білім беру ұйымдарындағы құжаттаманы басқару жүйесі» бойынша түсінік беріліп, мектептің даму жоспары мен оқу жоспарының құрылымы таныстырылды. Бұл болашақ педагогтің ұйымдық- басқарушылық сауаттылығын арттыруға бағытталған маңызды қадам болды. Сонымен қатар олимпиада, түрлі байқаулар мен жарыстарды ұйымдастырудың тиімді жолдары талқыланып, білім алушылардың талантын ашу мен қолдаудың маңызы атап өтілді. «Инклюзия және үйден оқыту» бағыты да назардан тыс қалмай, мұғалімнің ерекше қажеттілігі бар балалармен жұмыс істей білуі – кәсіби міндет қана емес, адамдық жауапкершілік екені айтылды. Шарада «Адал азамат» біртұтас тәрбие бағдарламасының мазмұны ашылып, оқу-тәрбие үдерісіндегі ұлттық құндылықтардың рөлі айқындалды. Мектеп психологы оқушылардың ойлау динамикасын арттыруға арналған психологиялық тренингтердің мәнін түсіндірсе, «Жан жылуы – бояу тілінде арт-терапия» бағыты студенттердің ерекше қызығушылығын оятты. Арт-терапия арқылы баланың эмоциялық әлемін тану мен қолдау тәсілдері көрсетілді. «Студент – болашақ маман» тақырыбы аясында жас педагогтың кәсіби бейнесі, оның бүгінгі мектепке қажет басты құзыреттері талданды. Бұл мазмұнды кездесудің спикерлері – өз ісінің мамандары, тәжірибе мектебінің ұстаздары болды. Шеберлік сабақ болашақ мамандар үшін үлкен серпіліс болды. Тәжірибе мен теорияның сабақтасқан бұл кездесуі жас педагогтің кәсіби жолына бағыт-бағдар беріп, тәлімгерлік пен жаңашылдықтың үйлесімді үлгісін көрсетті. Бүгінгі студент – ертеңгі ұлт ұстазы. Сондықтан мұндай кездесулер олардың кәсіби шыңдалуына жол ашатын маңызды дүние деген сенімдеміз.