Студенттік клубтар жәрмеңкесі - жаңа мүмкіндіктер алаңы

2025 жылдың 9 қыркүйегінде Абай атындағы Қазақ ұлттық педагогикалық университетінде дәстүрлі студенттік клубтар жәрмеңкесі өтті. Бұл шара - студенттер үшін жаңа мүмкіндіктер мен шығармашылық орталарға жол ашқан маңызды оқиға болды.

Күні кеше университет алаңында өткен жәрмеңке - студенттер қауымдастығының ең күтілетін шараларының бірі. Мұнда әр факультеттен шыққан ұйымдар өз жетістіктерін таныстырып, жаңа студенттерге университеттегі шығармашылық, ғылыми және қоғамдық өмірдің сан қырын көрсетті.

Жәрмеңкеге қатысушылар өз ұйымдарының мақсаттары мен жетістіктері туралы айтып, түрлі көріністер мен өнерлік нөмірлер арқылы студенттерге ерекше әсер қалдырды. Бұл - тек таныстыру емес, жаңа достықтар мен бастамалардың алғашқы қадамы болды.

Осы айтулы шарада Өнер факультетінің «Тұмар» студенттік ұйымы ерекше белсенділік танытты. Ұйым құрамындағы Auez_Band, Beine, Alash, Sound Rise, Visage студенттік клубтары өз орталарына жаңа қатысушыларды қабылдап, жаңа оқу жылындағы белсенді жұмыстарын бастады.

Бұл клубтар студенттерге өз таланттарын ашуға, шығармашылық қабілеттерін дамытуға және өнер саласында тәжірибе жинауға зор мүмкіндік беріп отыр.

Студенттік клубтар жәрмеңкесі - университет өміріндегі ең жарқын дәстүрлердің бірі. Ол студенттерді біріктіріп, жаңа идеялар мен жобалардың бастамасына айналды.