қазақша · русский · english
   
  Main  News
23.09.2014

Тілдер мерекесі

Біздің елімізде тілдер мерекесі биыл 25-ші рет аталып өтіп отыр. Ата заңымызда қазақ тілі- мемлекеттік тіл, орыс тілі ресми қарым-қатынас тілі болып жарияланып, елімізде «Тіл туралы» арнайы заң қабылданғаннан бері тілдерді дамыту жөнінде көптеген игілікті істер атқарылды. Бұл заң мемлекеттік және ресми тілдермен бірге Қазақстанды мекендейтін ұлттар мен ұлыстардың тілдерін дамытуға, ол үшін барлық жағдайларды жасауға кепілдік береді. Сондықтан бүгінде елімізде ұлттардың мәдениеті мен салт-дәстүрлерін, тілдерін дамыту мақсатымен Қазақстан Халықы ассамблеясы, оның аясында жүздеген ұлттың мәдени орталықтары құрылғаны белгілі. Осы орталықтардың бәрі де өз мәдениеті мен тілдерін өрістетумен бірге Президентіміздің ұлтаралық бірлік пен татулықты сақтау жөніндегі сара саясатын жүзеге асыруға, Қазақстанда тұрақтылықты нығайтуға қызмет етіп келеді.

Сонымен қатар бүгінде елімізде «үштұғырлы тіл» саясаты жүзеге асырылуда. Елбасымыз Н.Ә. Назарбаев Ұлытаудағы сұқбатында: «... үш тілді-мемлекеттік тілді, орыс тілін және ағылшын тілін игергеніміз өте дұрыс. Соның ішінде біздің мемлекеттік тіліміз қатар келе жатыр. Біз осылай үштұғырлы тілді қолдансақ, түбінде біздің жолымыз ашық болады. Мемлекеттік тіл мен ресми тілді игерумен қатар ағылшын тілін жақсы меңгеріп жатсақ, өркениеттер көшінен қалыспайтынымыз анық. Ағылшын тілін дүние жүзі халқының 70 пайызы қолданады. Ол- ғылым мен білімнің, ақпарат құралдарының, интернеттің, медицина мен мәдениеттің тілі»,- деді. Сондықтан біздің елімізде қазақ, орыс, ағылшын тілдерін қатар меңгеру аса қажеттіліктен туып отыр. Көп тіл үйрену қазақ елі азаматтарының интелектуалды тұлға болып қалыптасуына жол ашатын зор мүмкіндік.
Абай атындағы ҚазҰПУ-да «Қазақстан халқының Тілдері күні» мерекесіне орай өткізілген «Жеті жұрттың тілін біл» акциясын ашарда сөйлеген сөзінде осылай деген университеттің тәрбие ісі жөніндегі проректоры, профессор Ж.Е.Ішпекбаев мерекеге жиналған студентер мен профессор-оқытушылар құрамын Тіл мерекесімен шын жүректен құттықтады.
Қазақстанды мекендейтін этностардың ұлттық киімдерін киген студентер сол ұлттардың салт- дәстүрлерін, өнерлерін көрсетуден, ұлттық тағамдарын әзірлеуден жарысқа түсті. Әне, қазақтың «Қамажайы», орыстың «Частушкасы», өзбектің «Биле-биле», грузиннің «Лезгинкасы» кезек-кезек шырқалып, алаң үсті думанға бөленді.
«Қазақтар шешен сөйлейді, қара сөзінің өзі өлең секілді төгіліп тұрады. Қазақ тілі француз тілінен кейінгі ең көркем де сұлу тіл», - деп ХІХ ғасырда-ақ академик А.Радлов әдемі сипаттама берген қазақ тілі де бұл мерекеде ерекше әспеттелді. Студенттердің бірі шығарған екі жол өлеңін екінші, үшіншілері әп сәтте сәтті жалғастырып, әдемі ұйқас, терең ой түйіп жатқаны жастардың «Қайым айтысты» жақсы игерумен бірге, сөз құдіретіне, тіл көркемділігіне деген көзқарастарының кеңейе түскенін көрсетеді. Сондай-ақ мерекеге қатысушылар қазақ тіліне қатысты көптеген викториналық сұрақтарға жауап берді.
Қазылар алқасы ұлттық салт-дәстүрлер мен өнер байқауында «Педагогика және психология», «Математика, физика және информатика», «Филология және көптілді білім беру», «Құқық және экономика», «Өнер, мәдениет және спорт», «Жаратылыстану және география», институттарының студенттері асқан белсенділігімен көзге түскенін атап көрсетті. Жеңімпаздар грамоталармен марапатталды.
Тілдер күні аясында жарияланған апталықта тілге байланысты дөңгелек үстелдер, тіл өнері байқаулары өткізілді.

 

М.Ахмет,
Абай атындағы ҚазҰПУ
Ақпарат орталығының жетекшісі