«ҚР жоғары оқу орындарында психологиялық қызметті дамыту» республикалық форумы

2023 жылғы 30 мамырда «Психологиялық қызмет» секторының ұйымдастыруымен «ҚР жоғары оқу орындарында психологиялық қызметті дамыту» тақырыбында республикалық форум өтті. Іс-шараны Басқарма төрағасы-ректор Дархан Біләлов құттықтау сөзімен ашты. Форумға ҚР Ғылым және жоғары білім министрлігі Жоғары және жоғары оқу орнынан кейінгі білім комитеті төрағасының орынбасары Ақерке Абылайхан, 80-нен астам психолог, еліміздің 58 жоғары оқу орнының профессор-оқытушылар құрамы және проректорлары қатысты.

Форумның басты мақсаты - еліміздегі жоғары оқу орындарындағы психологтарға студенттер арасында психологиялық жайлы орта қалыптастыруына ықпалдасу, психологиялық сектордың қызметін интеграциялау және мамандар арасында өзара тәжірибе алмасу.

Іс-шараның бірінші бөлімінде PhD докторы, қауымдастырылған профессор Мәншүк Құсайынова «Психологиялық қызметті дамыту және интеграциялау перспективалары» тақырыбында тренинг өткізді. Ол өз тәжірибесімен және студент жастарды зерттеуде психологтарға қажет әдіс-тәсілдермен бөлісті. Тренинг соңында университетіміздің әлеуметтік даму жөніндегі проректоры Шыңғыс Нұрланов барлық қатысушыларға сертификаттар табыс етті.

Іс-шараның екінші бөлімінде университет психологы Саида Қосбай қатысушыларды «Психологиялық қызмет» секторының қызметімен таныстырды, ал психолог Алия Мұсанова «Студенттердің психологиялық портреті» тақырыбындағы зерттеу жұмысымен бөлісті.

Сондай-ақ форум барысында университет басшылығының қолдауымен психологтар студенттерге арнап құрастырған «Шабыттан» психологиялық дәптері таныстырылды. Ашық микрофон аясында қатысушылар пікір алмасып, ортақ мәселелерді талқылап, өз ұсыныстарын білдірді.

Іс-шара соңында еліміздің әр өңірінен келген қатысушылар Алматы қаласының мәдени-тарихи орындарын аралады.

«Психологиялық қызмет» секторы