қазақша · русский · english
   
  Негізгі бет / Жаңалықтар
24.04.2018

«Конституция және қоғамдық еркіндік: құқықтық моделді қалыптастыру (Қазақстан мен Франция тәжірибесі)» халықаралық ғылыми-практикалық конференциясы

 

2018 жылдың 20 сәуірінде Абай атындағы Қазақ ұлттық педагогикалық университетінің Сорбонна-Қазақстан институтында «Конституция және қоғамдық еркіндік: құқықтық моделді қалыптастыру (Қазақстан мен Франция тәжірибесі)» тақырыбында халықаралық ғылыми-практикалық конференция өтті.

 

Конференция Абай атындағы Қазақ ұлттық педагогикалық университетінің, Қазақстан Республикасының Тұңғыш Президенті - Елбасы Қорының, Қазақстандағы Франция Елшілігі мен Францияның Орталық Азияны зерттеу институтының (IFEAC) ұйымдастыруымен өткізілді.

 

Конференция жұмысына Абай атындағы Қазақ ұлттық педагогикалық университетінің ректоры Такир Балықбаев, Қазақстан Республикасы Конституциялық Кеңесінің Төрағасы Қайрат Мәми, Франция Республикасының Қазақстандағы Төтенше және Өкілетті Елшісі Филипп Мартинэ, Франция елінің сарапшылары, Франция Республикасының мемлекеттік органдарының өкілдері, сонымен қатар ҚР Тұңғыш Президенті - Елбасы Қорының атқарушы директорының орынбасары Игорь Рогов, ҚР Бас прокурорының орынбасары Марат Ахметжанов, ҚР Жоғарғы Сотының мамандандырылған сот алқасының төрағасы Айгүл Қыдырбаева, Алматы қаласының прокуроры Берік Жүйріктаев, Д.А. Қонаев атындағы Еуразиялық заң академиясының ректоры Жалаири Өмірәлі қатысты.

 

Конференцияны ашқан ректор Такир Балықбаев, Қазақстан және Франция екі мемлекетінің президенттері ашқан  Абай атындағы ҚазҰПУ-дың жанындағы  Сорбонна-Қазақстан институты екі ел арасындағы бірқатар өзекті мәселелер мен сарапшылардың жаһандық даму сұрақтарын талқылаудағы пікір алмасу алаңына айналғандығын атап өтті. 

 

Сөз кезегінде Франция Республикасының Қазақстандағы Төтенше және Өкілетті Елшісі Филипп Мартинэ Қазақстан мен Франция арасындағы екіжақты ынтымақтастықты одан әрі дамытудың маңыздылығына тоқталып, ҚР ғылым және білім министрі Ерлан Сағадиевпен бірлесе отырып Абай-Верн бағдарламасын жүзеге асыру туралы құжатқа қол қойылғандығын хабарлады.


Конференция барысында ҚР Конституциялық Кеңесінің Төрағасы Қайрат Мәми: «Құқықтар мен бостандықтарды құқықтық реттеу дәрежесі құқық қолданудың сапасы ретінде еліміздің даму дең­гейін, халықтың әл-ауқатын көр­сетеді, түптеп келгенде мемлекеттің әлемдік рейтингін айқындайды» - деді.

 

Конференцияның модераторы, Қазақстан Республикасы Тұңғыш Президенті - Елбасы Қорының атқарушы директорының орынбасары Игорь Рогов сөз кезегінде екі елдің конституциялары бір-біріне өте ұқсас екенін атап өтті. Сондай-ақ, Қазақстан Республикасының қолданыстағы Конституциясын әзірлеуде француз мамандарының белсенді қатысқандығы, сонымен қатар Қазақстанның құқықтық құрылысында және құқық қорғау қызметінде және сот жүйесі сияқты арнайы салаларды қалыптастыру кезінде Франция елінің тәжірибесі ескерілгендігі туралы айтты.

 

Конференцияда француз сарапшылары террорлық қатер мен төтенше жағдай кезінде қоғамдық еркіндіктің маңыздылығын атап өтті. Қазақстандық сарапшылар өз кезегінде Қазақстан Республикасының Конституциясына конституциялық реформа жүргізу барысында террористік және экстремистік әрекеттерге қарсы тұру жолында азаматтықтан айыру мәселесі бойынша өзгерістер енгізілгендігін еске салды.


Қазақстан мен Франциядан келген ұлттық сарапшылардың қатысуымен өткізілген, екі ел арасында өзара тәжірибе алмасуға мүмкіндік берген халықаралық ғылыми-практикалық конференция өте жемісті өтті.

 

         

 

         

 

         

 

         

 

         

 

         

 

Қоғаммен байланыс жөніндегі бөлім



688

Кері оралу

 
 
 
 
Besucherzahler
 
Besucherzahler